Ish-kryeministri i Kosovës, Avdullah Hoti ka uruar Donald Trumpin për zgjedhjen e presidentit të 47-të të Shteteve të Bashkuara të Amerikës.

Me anë të një postimi në Facebook, deputeti i LDK-së tha se miqësia mes Kosovës dhe SHBA-së është një nga shtyllat kryesore ndërsa shtoi se duhet të thellohen marrëdhëniet mes dy vendeve, përcjell Arbresh.info.

Postimi i plotë:

Zgjedhjet në Shtetet e Bashkuara të Amerikës dëshmuan standardet demokratike amerikane, modelit të demokracisë në gjithë botën.

Urime të përzemërta Presidentit Trump dhe Zëvendëspresidentit JD Vance për fitoren e tyre. Mbarësi e suksese në lidershipin e tyre në Shtëpinë e Bardhë në katër vitet në vijim.

Falënderime Presidentit Biden dhe Zëvendëspresidentes Harris për mbështetjen për Kosovën dhe gjithë shqiptarët gjatë katër viteve të fundit.

Populli i Kosovës është përherë krah Shteteve të Bashkuara të Amerikës. Miqësia e përhershme e popullit të Kosovës me Shtetet e Bashkuara të Amerikës është një nga shtyllat kryesore të shtetësisë sonë. Duhet të thellojmë marrëdhëniet e veçanta midis dy vendeve.

Vetëm në koordinim dhe mbështetje nga Shtëpinë e Bardhë, Kosova lëviz sigurt drejt integrimit euroatlantik.

Zoti e bekoftë Amerikën!

Zoti e bekoftë popullin e saj!/Arbresh.info